|
14th August, 2007
SIPITANG: Mositi o puu Umno do au kopiuman kotongob toi koosi miampai do paati gugumaga, ka di Datuk Anifah Haji Aman.
Huguan Umno Boogizan Kimanis diho, i hinansan di Puu Kounsol Takavas Umno, i Datuk Ahmad Zahid Hamidi, minoboos do mositi o ponoihiamn do hib kumaa doid dioho i nadadi ‘sangod id saahom tibung.”
“Mositi do au tokou kotongob toi oosizan kumaa doid paati gugumaga tu kitoihaan kozo o layat doid monoodo nunu noopo koputusan ontok pomihian tagazo do touvi…oonu i mositi do biion dotokou nopo nga izioho i kikoimaan ‘sangod i saahom tibung,” ka disido di ontok pinopoimagon pitimbungakan Umon Boogizan Sipitang, doiti di koniab.
Minoboos isido do mositi o puu Umon do ohuduk om ouhi doid koponoimaan om nogi papapanau koundunan do paati.
“Sbaagi puu paati, mositi tokou do kotumbozo kumaa doid buuan doguhu,” ka disido om minoboos vagu do nung migit o puu Umno do inuhi om kohudukan doid papapanau undunon do paati, pointantu no o Umno do kotihombus kaanu kahansanan om nogi kotumbazaan kumaa doid layat.
Tumanud disido, ontok ponogi diho pointantu no o layat do au monoimo om monokodung do paati gugumaga.
Minoboos i Anifah do au manahob o Umon do puu dino montok ‘lobi’ dumadi mokipihi nga izioho i kiangkab dumadi mokipihi mositi no do aiso koimaan papalaat toi mogohimut do buuan di poinsandad babaino.
“Aiso kobohingkaangan montok ‘lobi’ dumadi mokipihi nga ada no do papataal toi mogohimut buuan di poinsandad,” ka vagu disido.
Poingkuo po nga minokianu isido dioho i magahung om puu Umno do monoimo om kotumbozo kumaa doid koputusan di maan do buuan paati id puun kokomoi iisai i maan pihio dumadi mokikipihi toi mingkakat.
Ka disido, iisai noopo i opihi montok dumadi mokikipihi nopo nga mositi no onuan sokodung om okon ko pobibion montok pootuon.
Di poguhui diho minoboos i Huguan Umno Boogizan Sipitang, i Datuk Sapawi Ahmad do mositi o puu Umon do minggisom montok papavakas do paati.
Ka disido, kivaa do tonggungan do puu Umno id savi avi nazatan, i pinataak do paati montok papanaon.
“Kalaja dobuuan om puu paati nga montok nogi do poposindak po vagu sunduvan vinakas umundun doid paati…mositi tokou papavakason o Umno montok popoingkavas po vagu kotumbazaan om kahansanan do layat,” ka disido om minoboos vagu do mantad di nokoikot o Umno id Sabah, kozuzuvo pulitik nahantoi do minonimban.
Ka disido, nakahantoi o Umon do minogovit do layat montok mongumbangan kumaa doid ahal ngaavi di hobi ginazo om kikoimaan nasional miampai monuidong om papapantod do pisompuuvan om pilotian tinau.
Tumanud disido, Umno nopo nga sondion kumaa doid pilotian om pisompuuvan tinau miampai nadadi toigi kumaa doid Barisan Nasional (BN).
Ontok ponogi diho, soginumu 548 hahansanon Umon Sipitang do otinduhu ohou, monokodung tuu puu Umno boogizan nokomoi montok tumindapou id pitimbungakan Umon Malaysia do mikot.
Izioho nopo nga kaampai no i Dulkifli Haji Ahmad, Mustapa Mamit, Pangeran Shamsudin Pangeran Matasan, Ahmad Ghapar, Ali Ghapar, Sari Ramin om i Ghafar Jidan.
Umno Boogizan Ranau, i binuuan di Kumoduvo Huguan Umno Boogizan, i Jaimin Samitah, i ponogi hinansan do Tinan Pionitan Umno Sabah.
|
